He rauemi hei ako i te Reo Māori

He rauemi a Te Whanake hei ako i te reo Māori mai i te tīmatanga tae noa ki te wā e matatau ana te tangata ki te reo Māori.

Ngā Pukapuka Matua

E whā ngā pukapuka matua mai i te tīmatanga tae noa ki te wā e matatau ana te tangata ki te reo Māori. Koia nei ngā tino pukapuka o Te Whanake, ā, whakapakari ai ēnei i ngā pūkenga kōrero, whakarongo, pānui me te tuhituhi o te reo Māori o te akonga. Ina tata nei kua tāia ngā putanga tuarua o ngā pukapuka matua e whā e Longman/Pearson Education o Aotearoa.

Pukapuka Tātaki

Hei hoa ēnei mō ngā pukapuka matua e toru. He mahi kei roto hei whakapakari i te mōhio o te akonga ki ngā momo takotoranga i ngā kupu, ki ngā kupu, ki te pānui me te tuhituhi i te wā kāore te akonga i te aroaro o te kaiako. Hei ako anō hoki i ngā momo kōrero kua whakamāramatia i ia wāhanga o te pukapuka matua. He whakamahuki atu anō mō te wetewete i te reo. He whakaaro anō hoki hei āwhina i te akonga ki ngā pūkenga hei ako i te reo, pērā i te raparapa i te tikanga o ētahi kupu mai i te horopaki, i te whakamahi i ngā kupu kia tika ai, i te pānui hoki kia mārama ai ngā kōrero. Ko ngā whakautu tika kei te mutunga o te pukapuka.

Ngā Kōpae

He mahi kei runga i ēnei hei ako i te whakarongo, i te kōrero hoki i ngā kupu me ngā kōrero o ia wāhanga o ngā pukapuka. E hāngai tonu ana ētahi mahi ki ngā momo whakatakotoranga kōrero, hei whakapakari ētahi mahi i te akonga ki te whakarongo ki te reo Māori. Mā te akonga tonu ēnei mahi i te wā kāore he kaiako.

Papakupu Māori

Ko Te Aka Māori-English, English-Māori Dictionary and Index te ingoa, ā, he papakupu hou mā ngā ākonga e ako ana i te reo Māori. Kua whiriwhirihia ngā kupu o te reo Māori o ēnei rā mō tēnei papakupu Māori hei āwhina i ngā tāngata e ako ana i te reo Māori. Atu i ngā kupu o ētahi atu papakupu o te reo Māori, kei roto i tēnei papakupu:

• ngā kupu me ngā whakamārama mō ngā rākau, mō ngā ngārara, mō ngā ika, mō ngā manu, mō ngā kararehe, mō ngā whetū, mō ngā whetūao me te whānau mārama, mō ngā momo waiata me ngā haka, mō ngā momo taonga pūoro, mō ngā rōpū, mō ngā whenua o te ao me ngā wāhi, mō ngā tāngata rongonui o te ao Māori anō hoki.
• he whakamārama mō ngā tikanga e hāngai pū ana ki te ao Māori.
• he whakamahuki me ētahi tauira rerenga kōrero mō ngā momo whakatakoto kupu.
• he whakamārama me ētahi tauira rerenga kōrero mō ngā kīwaha.

Kua kohikohia ēnei momo kupu hei āwhina i te akonga kia matatau ai ia ki te kōrero i te reo nei.

Ahakoa he papakupu motuhake tēnei, kei roto nei ngā kupu katoa o ngā pukapuka me ngā rauemi o Te Whanake, ā, he kuputohu anō hoki kia tere ai te kite i ngā kaupapa, i ngā mapi, i ngā whakaahua, i ngā kīwaha, i ngā whakataukī me ngā pepeha, i ngā whakamārama o ngā momo rerenga kōrero me te wetewete i te reo.

Pukapuka ārahi i te kaiwhakaako

Ko ngā kai kei roto i ēnei pukapuka he tohutohu mō ngā mahi takirua, mō ngā mahi ā-rōpū hoki me ngā kape mā te kaiako e whakaahua; he tohutohu me pēhea te mahi whakaako; ko ngā kōrero kei runga i ngā rīpene me ngā kōpae; he tauira whakamātautau hoki hei āwhina i te kaiako. E toru ngā pukapuka ārahi i te kaiwhakaako.

Te Whanake Kei Te Ipurangi

Hāunga te papakupu nei kei te ipurangi, he rauemi utukore anō kei te ipurangi hei hoa mō ngā pukapuka me ngā kōpae o Te Whanake.

He paki waituhi nō Te Whanake. He rauemi hou tēnei paetukutuku hei hoa mō ngā pukapuka me ngā rauemi o Te Whanake. Mā te akonga tonu tēnei e mahi i a ia kei te rorohiko me te ipurangi ahakoa kei hea. Ahakoa e tū motuhake ana tēnei rauemi, he pai ake te ako i te reo mehemea e haere ana te akonga ki tētahi karaehe me te kaiako e mōhio ana ki te whakaako i te reo, e matatau ana anō hoki ki te kōrero me te tuhituhi i te reo Māori, ā, kei te whai mai i ngā pukapuka matua, i ngā pukapuka tātaki, i ngā mahi kei runga i ngā kōpae o Te Whanake me te papakupu (arā, Te Aka Māori-English, English-Māori Dictionary and Index).

Hei mahi ipurangi nō Te Whanake. Ko ngā mahi katoa ēnei o ngā pukapuka matua e whā o Te Whanake. I runga rīpene ēnei mahi i ngā wā o mua, ā, kua whakawhitihia ki te ipurangi. Hei whakapakari i ngā pūkenga reo, arā, te whakarongo, te kōrero, te pānui me te tuhituhi. Ka taea te mahi ki te rorohiko, ki te pouaka whakaata, ki te iPod, ki te waea 3G me ērā momo. Ka āwhinatia koe e ēnei hanga ki te ako i te reo Māori e akona ana i ngā wāhanga o ngā pukapuka o Te Whanake.

Ka taea e koe ēnei paetukutuku te hono atu i te whārangi matua o Te Whanake.